Dünən Bakıda sosial tələblərlə daha bir etiraz aksiyası oldu. “Zəkalar” liseyində dərs alan şagirdlərin Xətai rayonunda yerləşən 88 saylı orta məktəbə köçürülməsi etirazlara səbəb oldu. 88 saylı məktəbin müəllimləri və şagirdləri yeni təmir olunmuş təhsil ocağından sürgün edilmələrinə qarşı çıxdılar.

Sentyabrın 9-da məktəbdə oxuyan şagirdlərin valideynləri və müəllimlər ayağa qalxdılar. Onlar yenicə təmir olunaraq istifadəyə verilmiş 88 saylı məktəbdən çıxmayacaqlarını, sonadək mübarizə aparacaqlarını bəyan etdilər.
Adıçəkilən məktəbin müəllimləri ilə orada təhsil alan uşaqların valideynləri səhər saatlarından etibarən məktəbin həyətinə toplaşmışdı. Onlar məktəbin “Zəkalar” liseyinə verilməsindən narazı qaldıqlarını söylədilər.
Aksiya yerində söhbətləşdiyimiz valideynlər qeyd etdilər ki, bu məsələdə açıq-aşkar ayrı-seçkilik edilir. Belə ki, “Zəkalar” yeni təmir olunan 88 nömrəli məktəbə köçürülür, onların övladları isə şəraitsiz “Zəkalar” liseyinin binasına. Valideynlər şagirdlərin liseyin binasına da köçürüləcəyinə inanmır. Dediklərinə görə, liseyin binası söküləcək və yerində çoxmərtəbəli bina inşa olunacaq. 88 saylı məktəbin müəllim və şagird heyətinin aqibəti isə sual altındadır