Xırdalan şəhər H.Zərdabi küçəsi məhəllə 26-nın sakinləri özləri demişkən az qala hər ailəyə bir qayıq almalı olacaqlar

Bənzər vəziyyət qonşu küçələrdə də yaşanırdı. Yəni hərə bir rezin çəkmədə, ya da gedəcəyi yer üçün şəxsi avtomobilində bu suları yara-yara addımlayırdı. 26-ci məhəllə sakinlərinin dərdini Azərsu ASC-nin ictimaiyyətlə əlaqələr departamentinin rəisi Anar Cəbrayıllı ilə bölüşdük. Departament rəisi bildirdi ki, sözügedən ünvandakı vəziyyətdən xəbərdardılar. Mövcud vəziyyətə səbəbsə ərazidəki xətlərin köhnə olması, üstəlik ətrafda tikilən göydələnlərin ümumi kanalizasiya xəttinə qoşulmasıdır. Buna görə də suyu çəkməyə nasosların gücü çatmır. A.C. bildirdi ki, bütün bu problemlər nəzərə alındığından hələ ötən ilin sonlarından Xırdalanda çirkab sularının qarşısının alınması üçün layihə hazırlanıb. Hazırda icrası həyata keçirilən layihəyə əsasən adıçəkilən ərazilərdəki kanalizasiya suları əvvələr Hövsana axıdılırdısa, indi Lökbatan qəsəbəsində tikiləcək təmizləyici qurğuya istiqamətlənəcək. 7 km uzunluğunda olan tunel tipli kanalizasiya xətti həm Masazır, həm də Xırdalan şəhər ərazisindəki çirkab sularını aradan qaldıracaq. Layihənin tam başa çatacağı tarix 2014-cü ildir.