Ana-oğul aslanovlara qarşı ciddi ittihamlar irəli sürüldü: Türkiyə MİT-i Bakıdakı “gizli texnoloqlar”la birləşib; nurçu qalmaqalı daxili siyasətə daşınır; hər iddia bir suç, bir cinayət...

Prezident Administrasiyasında məsul vəzifə tutan və təriqətçi olduqları iddia edilən vəzifəli məmurlarla bağlı qalmaqal davam edir. Martın ilk həftəsi hakimiyyət daxilinə sızmasından danışılan bu qrupun və onlara qarşı ifşa kampaniyası aparan gizli texnoloqların virtual savaşının daha da şiddətlənməsi ilə yadda qalıb.

“Gizli texnoloqlar” deyilən qrupun ifşa kampaniyasında əsas hədəf hələ də Azərbaycan əsilli nurçulardır.

Prezident Administrasiyasının olduqca əhəmiyyətli postlarını tutan Elnur Aslanov (Prezident Administrasiyasının Siyasi təhlil və informasiya təminatı şöbəsinin müdiri), Fərhad Məmmədov  (Prezident yanında Strateji Araşdırmalar Mərkəzinin rəhbəri) və onların himayəsində olan digərləri barədə heyrətamiz dərəcədə özəl, lakin həqiqət olub-olmadığı təsdiqlənməyən məlumatlar yayan qrup yeni sənədlər, gizli məktublar, hətta səs yazısı da faş edib. Diqqətçəkən məqam isə budur ki,...
nurçuların gizli yazışmaları deyə iddia olunan sənədləri faş edən qrup əslində özünü də ələ verir. 

Olduqca məxfi sənədlər ifşa olunursa, bu deməkdir ki, ortada xüsusi xidmət orqanlarının da dəstəyi var və məsələ daha ciddidir. Əlbəttə, E.Aslanov və F.Məmmədovun tutduqları postun şriftlərini höccələsən də, bütöv da oxusan, orada “Prezident Administrasiyası”,  “Prezident yanında...” ifadələri dərhal gözə və zehnə xitab edir. Belə çıxır ki, günlərdir “prezidentin yanında” olan iki məsul məmur və onların çetesi (dəstəsi) şiddətli ifşa, virtual hücumlara məruz qalırlar, onlar barədə adi adamların əlinin çata bilməyəcəyi məlumatlar sosial şəbəkələrdə şütüyür, qəzetlərə manşet olur; lakin dövlətin rəhbərliyindən bunlara reaksiya verilmir.

 Bunun da anlamı, izahatı budur ki, əslində bu gəncləri “dövlət baba” özü vurdurur, onlar “seçilmişlərdir”, qurban olaraq adaqlanıblar (işarələniblər). Həm də bu o, deməkdir ki, “dövlət baba” bu məmurlar barədə bütün iddiaları artıq qəbul edib, onların Türkiyədən gələn bir təriqətin Azərbaycandakı ayağı olması bilgisini ballandıra-ballandıra cəmiyyətə yedirdir; az sonra əməliyyat başladacaq, onları sıradan çıxaracaq. 7 mart günü Mətbuat Şurasının təşkilatçılığı, Prezident Administrasiyasının şöbə müdiri Əli Həsənovun iştirakı ilə keçirilən tədbir də “adaqlanmışlar” üçün “əcəl zəngi” sayıla bilər. 

Burada Türkiyə amilini də unutmaq olmaz. Görünən budur ki, “gizli texnoloqlar” yalnız azərbaycanlılardan ibarət deyil. Burada Türkiyə MİT-in də qatqısı hiss olunmaqdadır. Əgər bakılı texnoloqların hədəfində öz yerli nurçuları varsa, tədricən kampaniyaya Türkiyədən gəlmiş “Xidmət Hərəkatı” -  fətullahçıları da qoşurlar - hədəf edirlər. Günlərdir ki, “Yeni Müsavat”ın ünvanına “Xidmət”in məktəbləri, universiteti, onların Bakıdakı liderləri, televiziyası və onun rəhbərliyi barədə israrlı məlumatlar, yazılar daxil olmaqdadır. Hazırlanma və təqdimetmə metodikası, yazıların strukturu, gizli yazılan səs yazısı təcrübəli qəzetçilərdə şübhə doğurub: “Bizimkilər belə işləmir. Bu, yad ünsürlərin taktikasıdır ”, -  qeydi bu sətirlərin müəlliflərinə də söylənib.  

Biz iddia etmirik, lakin şübhə edirik ki, rəsmi Bakıdan “ya mən, ya Gülən” tələbi edən Türkiyənin baş naziri Azərbaycandakı nurçu deyilən “Xidmət Hərəkatı”nı sıxışdırmaq üçün ortaq bir qrup qurmağa nail olub. Proseslərin bundan sonrakı inkişafında yəqin ki, vektorlar azərbaycanlı nurçulardan Türkiyədən gələn və illərdir Bakıda fəaliyyət göstərən “könüllülər hərəkatının” tanınan üzvlərinə doğru dəyişəcək. Hazırda baxmayaraq ki, Elnur Aslanov və Fərhad Məmmədov olduqca strateji postlar tuturlar, ölkə iqtidarının informasiya və analitika təminatı onlardan sorulur; “gizli texnoloqlar” qısa müddət ərzində onları və tabeçiliyindəki bütün potensialı qeyri-münasib duruma sala bilib.

 Elnur Aslanov və onun dəstəsi müdafiə ilə məşğuldur; informasiya savaşında yol verilməz bir haldır;  üstəlik, bu işi də fərli qura bilmirlər. Həm də, yuxarıda da qeyd etdiyimiz kimi, iqtidara bağlı olan başqa kimsə onları himayə və müdafiə etmir. İnkar və imtina, bir tərəfdən də ünvansız ittihamlar hazırda ölkənin baş informasiyaçısının (E. Aslanov) və baş analitikinin (F. Məmmədov) əsas silahıdır... “Dövlət özünün informasiya təminatını gör kimlərə həvalə edib”,  - “nurçu” cütlüyün son davranışları bu qeydlərin bir çox dəfə səslənməsi ilə müşayiət olunmaqdadır.  

Etiraf etmək lazımdır ki, Elnur bəyin anası Rəbiyyət xanım oğlunu və onun dəstəsini onların özlərindən daha keyfiyyətli, inandırıcı və ürəkdən, qorxmadan müdafiə edib. “Yeni Müsavat” qəzetinə müsahibə verən R. Aslanova dişi aslan kimi, oğluna hücum edənlərə kükrəyib. Lakin ana ürəyidir;  - bir sıra ciddi məqamlarda “obıvatel”in tuta bilməyəcəyi səhvlər buraxıb. “Gizli texnoloqlar” bunu əfv etməyib. Onlar müxalifət mediasının sevimli məlumat qaynağına çevrilmiş “İnci Azeri” profilində (facebook) bu müsahibənin cavabını ağır veriblər. Həmin yazı elektron poçtla bir sıra saytlara da serviz edilib. 

“Gizli texnoloqlar” yazır:  “Milli Məclisin deputatı Rəbiyyət Aslanova ”Yeni Müsavat" qəzetinə müsahibəsində bildirib:

- Elnurla bu barədə söhbət edəndə o, çox gözəl və məni sevindirən bir söz dedi. Söylədi ki, ana, sən bu məsələlərə qarışma, sənin öz mövqeyin var, orda çalışırsan, mənim də öz mövqeyim. Biz evdə ana-balayıq, ancaq biz siyasətçilərik, mənim sənin köməyinə və məni müdafiə etməyinə heç bir ehtiyacım yoxdur, mən özüm-özümü müdafiə etmək iqtidarında olan birisiyəm. Bu, bir ana kimi məni çox sevindirdi. Başa düşdüm ki, ana olaraq həmin səddən o yana keçmək mümkün deyil və buna ehtiyac da yoxdur. Vətəninə, xalqına, dövlətinə sədaqətli bir övlad böyütdüyümə görə qürur hissi yaşadım. Bilirəm ki, ona qarşı yönələn təhdidlərə sinə gərə bilən güclü siyasətçidir..."

Əslində Elnur Aslanova bu sözlərlə zərər vurduğunu bilməyən Rəbiyyət xanım oğlunun rəqiblərinin əlinə ciddi arqument verib. Onlar da bu arqumenti bu cür formulə ediblər: “Açıq etiraf olunur ki, Elnur Aslanov icra strukturunda çalısan sadə bir məmur deyil, siyasətçidir. 2013-cü il prezident seçkilərindən əvvəl DADP sədri Məmməd Əlizadə partiya sədri postundan istefa verdi. Həmin dövrdə mediada xəbər yayıldı ki, yeni sədr Fatma Əliyeva Milli Məclisin deputatı Rəbiyyət Aslanovanın iş ortağıdır. Bu işin bir ucu Moskvadan keçərək Milli Şuraya qədər uzanırdı...” Burada “gizli texnoloqlar” haqsız yerə Rəbiyyət xanımın evlilik yapdığı və Rusiya prezidenti ilə dostluğu olan tanınmış iş adamının adını qeyd edirlər. Buradakı cəhd aydındır - hədəf obyektinin Moskva ilə, “Milyarderlər İttifaqı” ilə, Putinin Azərbaycan iqtidarına qarşı çevriliş planı ilə bağını qurmaq, suç dosyesini daha da böyütmək...

Yazı bu cür davam etdirilir: “Milli Şura projesi DADP layihəsi iflasa uğradıqdan sonra daha da aktuallaşdı. İlkin layihə isə DADP-ni almaq, təşkilatlandırmaq, gücləndirmək və iqtidar partiyası olan YAP-a alternativ siyasi qüvvə kimi ortaya çıxarmaq idi.

Rəbiyyət Aslanova və onun oğlu Elnur Aslanov isə bu layihənin tən ortasında mərkəzi fiqurlar kimi göründülər. Bu reallıq həmin dövrdə bəzi politoloqların və medianın diqqətindən də yayınmadı.

Layihənin məqsədlərindən duyuq düşən partiya üzvlərinin çoxu  Fatma Əliyevaya etimadsızlıq göstərdilər və Əlisahib Hüseynovun rəhbərliyi altında Fatma Əliyevaya qarşı birləşdilər. Plan baş tutmadı.

Bu layihədə Elnur Aslanova hansı rol ayrıldığı barədə yalnız ehtimallarla danışmaq olar. Amma Rəbiyyət xanım oğlunu güclü bir siyasətçi kimi görürsə, niyə də DADP projesinin mərkəzi fiquru o olmayaydı?!

Digər tərəfdən, Elnur Aslanovun şəbəkəsinin - gənclər təşkilatlarının, media resurslarının, gözə görünməz piar şirkətlərinin, dövlət orqanlarında yerləşdirilmiş nurçular da daxil olmaqla, Azərbaycanın ictimai-siyasi həyatına və idarəçilik sisteminə təsir göstərmək istəyən nurçu komandanın mövcudluğu niyə də onun daha yüksək siyasi ambisiyalarının olmasından xəbər verməsin?!"

Göründüyü kimi, artıq Aslanovlar barədə onların iqtidara qarşı fəaliyyət göstərmək ittihamları arqumetləşdirilir. Rəbiyyət xanımın “oğlum güclü siyasətçidir” ifadəsinin iqtidarda da qıcıq yaradacağı bəllidir. Bir sıra media quruluşları isə artıq ironiya edirlər: “Sənin oğlun güclü siyasətçidir -  bəs Kissincer?”

  

*  *  *  *

Martın 6-da bu mövzuda bir qədər fərqli gəzişmə də oldu. Fərhad Məmmədovun mətbuata verdiyi məlum açıqlamaların ruhuna uyğun olaraq azxəbər.az saytı iddia etdi ki, facebook-dakı “İnci Azəri” profili “Bakı-Xəbər” qəzetinin baş redaktor müavini Samirə Səfərovanındır. Lakin “layihə”nin əsas rəhbəri qəzetin baş redaktoru Aydın Quliyevdir. Yazının sonuna əlavə edilən videoklipdə isə S.Səfərovanın guya nə zamansa həmin profildə yayılan şəkilləri yer alır. 

“Bakı-Xəbər” qəzetinin baş redaktoru Aydın Quliyev isə növbəti dəfə deyilənləri cəfəngiyyat adlandırıb: “Məni guya hansısa tapşırığı səriştəsiz icraçılıqda suçlayanlara demək istəyirəm ki, onları çox yaxşı tanıyıram, o üzdən onlar barədə fəhmlə, ehtimalla yox, tutarlı faktlarla öz adımdan danışa bilərəm. Ancaq buna ehtiyac olanda... Mən onlardan fərqli olaraq hansı səviyyəli təşkilatçı, icraçı və ideoloq olduğumu çoxdan sübut etmişəm. İndi isə biz öz işimizlə məşğul oluruq, gündəlik, ciddi qəzet buraxırıq, dövlətçilik üçün vacib saydığımız istənilən materialı çap etməkdə heç bir problemimiz yoxdur. Bizi şərə salmaq istəyənlər isə daha ciddi, sanballı işlərlə məşğul olsalar, pis olmaz. İtirdiklərini başqa istiqamətlərdə axtarsınlar. Biz onlar kimi boş və mənasız işlərlə məşğul olmuruq».