Bir müddət əvvəl BMT-nin xüsusi məruzəçisi Riçard
Folk tərəfindən hazırlanaraq, qurumun İnsan Haqları Şurasına təqdim olunan
hesabatda İsrailin mühasirəsi altındakı Fələstinin Qəzza zolağının 2020-ci ilədək
insanın yaşaması qeyri-mümkün əraziyə çevriləcəyi öz əksini tapıb. İşğal
edilmiş Fələstin torpaqlarındakı humanitar vəziyyətlə bağlı hazırlanan
hesabatda Folk İsrailin Qəzza zolağına embarqo tətbiq etməsi ucbatında ərazidə
səhiyyə və ekoloji problemlərin günbəgün artdığını qeyd edib. Folk şuradakı
çıxışında Fələstinin öz müqəddəratını müəyyən etmə haqqının uzun müddət
gecikdirildiyini və qəbul olunmadığını vurğulayaraq, minlərlə fələstinlinin
İsrail həbsxanalarındakı vəziyyətindən dolayı narahatlığını ifadə edib.
İsrailin Fələstin torpaqlarını sistemli şəkildə işğal etdiyini hesabatda
bildirdiyini deyən məruzəçi bunun Yaxın Şərq regionunda sülhün əldə olunmasına
xidmət etmədiyini vurğulayıb.
