Martın 4-də AXCP bir gün əvvəl zirzəmisində partlayış baş verən qərargahından çıxarılıb. Səhər saatlarından qərargah boşaldılmağa başlayıb. Əraziyə Çevik Polis Alayının qüvvələri gətirilib. AXCP üzvlərinin qərargahı boşaltmaqdan imtina etməsi isə gərginliyə səbəb olub. Nərimanov Rayon İcra Hakimiyyətinin nümayəndələri AXCP-yə binanın qəzalı oduğunu bildiriblər. Nərimanov Rayon İcra Hakimiyyəti başçısının müavini Şahmar İbadov bildirib ki, hadisə yerinə Fövqəladə Hallar Nazirliyinin və Nərimanov Rayon İcra Hakimiyyətinin əməkdaşları gəlib, müvafiq araşdırmalar aparılıb.

Ş. İbadov qeyd edib ki, FHN-in Tikintidə Təhlükəsizliyə Nəzarət Dövlət Agentliyi tərəfindən rayon icra hakimiyyətinə telefonoqram daxil olub. Daxil olan telefonoqramda qeyd olunan binanın yararsız vəziyyətə düşməsi səbəbindən ərazidə olan yaşayış və qeyri-yaşayış sahələrinin boşaldılması tapşırılıb: “Nərimanov Rayon İcra Hakimiyyəti başçısının sərəncamı ilə qeyd olunan ərazidə yaşayan üç ailə köçürülür, həmin ailələrə üç aylıq kirayə pulu ödəniləcək. Həmin ailələr dövlət tərəfindən tikilən binalarda mənzillə təmin ediləcək”.

İcra  başçısının müavini deyib ki,...  bina qəzalı olduğundan  söküləcək. 

Ş.İbadov AXCP Ali Məclisinin sədri Həsən Kərimovla görüşərək bildirib ki, AXCP-yə əşyaların daşınması üçün yük daşıyan avtomobil və əşyaların yığılması üçün anbar da təşkil ediblər. 

H. Kərimov isə azadlıq.info-ya bildirib ki, partiya üzvləri FHN əməkdaşlarından binanın boşaldılması ilə bağlı qərarı tələb etsə də, qərarın binanın sahibinə təqdim olunacağı deyilib: “Deyirlər  qərar mülkün sahibinə təqdim olunacaq, siz icarədarsınız. Ona görə hələlik bu məsələ açıq qalır. Müəyyən mənada qərarla tanışam. Orda yazılıb ki, bina qəzalı vəziyyətdə olduğu üçün FHN-in ekspertləri tərəfindən akt tərtib olunub və aktda göstərilir binanın hər an uçmaq təhlükəsi var”. 

H.Kərimov partiya tərəfindən ekspertlərin dəvət olunduğunu da bildirib: “Özümüz də inşaatçı mühəndisləri dəvət etdik və onlar dedi ki, bina qəzalı vəziyyətdə deyil və burda fəaliyyət göstərmək mümkündür. Bu da göstərir ki, binanın boşaldılması yuxarıların sifarişidir və FHN-in ekspertləri də bu sifarişi böyük məmnuniyyətlə yerinə yetirirlər”.

AXCP nümayəndələri qərargahı boşaltmaqdan imtina edəndən sonra Ş. İbadov binanın qəzalı olması ilə bağlı sənədi AXCP sədrinin müavini Gözəl Bayramlıya təqdim edib. G.Bayramlı həmin sənədi uca səslə səsləndirdikdən sonra AXCP üzvləri binanı boşaltmağa başlayıblar. Bu zaman polis əməkdaşları və AXCP-nın fəalları arasında mübahisə yaranıb.  Ancaq mübahisə uzun çəkməyib və bina boşaldıldıqdan sonra dərhal söküntü işləri başlayıb.

Fövqəladə Hallar Nazirliyi (FHN) Tikintidə Təhlükəsizliyə Nəzarət Agentliyinin rəis müavini Elxan Əsədov hadisə yerinə gələrək binanın sökülməsi səbəblərini açıqlayıb: “Araşdırma nəticəsində məlum olub ki, uzun illər əvvəl heç bir təhlükəsizlik tədbirləri görülmədən, tikinti norma və qaydalarına uyğun olmayaraq binanın ikinci mərtəbəsi tikilib. Bununla əlaqədar binanın mövcud konstruksiyası həddindən artıq yüklənib. Birinci mərtəbənin zirzəmisinin üstündə olan örtük ağac konstruksiyalardan ibarət olmasına baxmayaraq, sonradan onun üstündən monolit beton döşəmə konstruksiyası verilib. Aşağıdakı ağac konstruksiyalar da çürüdüyündən, döşəmə hər an çökə bilər ki, bu da içəridəki insanların həyatı üçün böyük təhlükə yarada bilər. Binanın zirzəmisi və birinci mərtəbəsi tam qəzalı vəziyyətdədir. İkinci mərtəbədən istifadə olunması isə qeyd etdiyim səbəblərdən yolverilməzdir. Orada hər an çökmə baş verə bilər”.

“Azəriqaz” İstehsalat Birliyi də AXCP qərargahındakı partlayışla bağlı açıqlama yayıb. Açıqlamada yanğınla müşayiət olunan partlayışın təbii qazla heç bir bağlılığının olmadığı vurğulanır. Bildirilir ki, FHN-in  qeyd etdiyi kimi, hadisə yerinə ilkin baxış zamanı biri tam dağılmış, digəri isə yanğının təsirinə məruz qalmış 2 ədəd propan qaz balonu aşkar edilib. 

Qeyd edək ki, AXCP uzun illərdir qərargahsız fəaliyyət göstərib. Partiyanın toplantıları ayrı-ayrı üzvlərin evlərində keçirilib və qurum ofissiz xeyli çətinliklərlə üzləşib. Sözügedən ofisi isə cəbhəçilər cəmi altı ay əvvəl tutmuşdular. Milli Şuranın bir çox toplantıları, görüşləri həmin qərargahda keçirilirdi. Bundan sonra AXCP-nin və Milli Şuranın durumu necə olacaq? Partiya başqa müxalifət partiyalarının ofisindən istifadə edəcəkmi? 

AXCP sədrinin müavini Fuad Qəhrəmanlının sözlərinə görə, baş verənlər onu göstərir ki, AXCP yenə qərargahsız fəaliyyət göstərməli olacaq: “Qərargahsız qalacağıq. Biz əvvəl də cəbhəçilərin evlərində toplanırdıq, toplantıları, iclasları ayrı-ayrı mənzillərdə keçirirdik. İndiki halda yeni qərargah icarəyə götürmək riskli görünür. Çünki bu qərargah şəxsi mülk idi və biz onu sənədlərlə, qanuni şəkildə icarəyə götürmüşdük. Bu, AXCP-yə qarşı siyasi terror aksiyasıdır. Görünən odur ki, hakimiyyət bizim normal siyasi fəaliyyətimizə imkan vermək niyyətində deyil. Baş verən hadisə həm də mülkiyyətçinin hüquqlarına da hörmətsizlikdir, bura şəxsi mülk idi və onun mülkiyyətinin sökülməsinə qanunsuz olaraq qərar verilib. FHN orada yoxlama apararkən biz eşitdik ki, binaya əsaslı zərər dəyməyib. Bununla belə, sökülür, bu, siyasi qərardır. Partlayış da binanın sökülməsinə əsas yaratmaq məqsədi güdürdü. Onsuz da illərdir ki, AXCP qərargahsız fəaliyyət göstərirdi, cəmi altı ay idi ki, qərargahımız vardı. AXCP-nin gücü daşda-divarda deyil, partiya üzvlərinin əzmindədir”.

Milli Şuranın sədri Cəmil Həsənli isə “Yeni Müsavat”a bildirib ki, qərargahla bağlı aydın bir planları olmasa da, bu barədə fikirləşəcəklər: “Hər halda, bir yer tapacağıq”.

Qeyd edək ki, bir neçə dəfə AXCP  Müsavat Partiyasının qərargahından toplantılarının keçirilməsi üçün istifadə edib. Həmçinin Milli Şuranın prezidentliyə vahid namizədi Cəmil Həsənlinin Seçki Qərargahı da Müsavat Partiyasında yerləşirdi. MŞ-nin toplantıları əksər hallarda burada keçirilirdi. 

Müsavat başqanının müavini Gülağa Aslanlı bildirib ki, onlar yenə də AXCP-yə yer verməyə hazırdırlar: “Hər zaman haqqı pozulanın müdafiəsinə və ona kömək etməyə hazırıq. Bizim qapımız müxalifət qüvvələrinin üzünə həmişə açıqdır”.