17 Şubat 2013 Pazar
“Bu həbslər müxalifəti daha da birləşdirəcək”
AXCP və Müsavat liderləi İlqar Məmmədovla Tofiq Yaqublunun həbsinə münasibət bildirdi
Fevralın 4-də Müsavat başqanının müavini Tofiq yaqublu və “ReAL” hərəkatının sədri İlqar Məmmədov İsmayıllı hadisələrinə görə təqsirləndirilərək barələrində 2 aylıq istintaq müddətinə həbs-qətimkan tədbiri seçilib. Bununla bağlı AXCP sədri Əli Kərimli və Müsavat başqanı İsa Qəmbərin mövqeyini öyrəndik.
Hakimiyyət öz taktikasını elan etdi
Əli Kərimli:
- Tofiq Yaqublu və İlqar Məmmədovun İsmayıllıda baş verən hadisələrlə bağlı həbs olunması onu göstərdi ki, Azərbaycanda son günlər artan gərginlik, etiraz hərəkatına qarşı hakimiyyət öz taktikasını müəyyənləşdirib: bundan sonra da yalnız repressiyalarla, öz haqqını tələb edən insanlara qarşı şər və böhtan üsuluyla, həbslərlə narazılıqları yatırmaq. Xalqı dinləmək, problemləri aradan qaldırmaq, ictimai-siyasi çevrələrlə dialoq yaratmaq kimi niyyətlərində qətiyyən olmadıqlarını nümayiş etdirdilər.
Bu həbsləri Azərbaycandakı qeyri-qanuni rejim həyata keçirsə də, məsuliyyəti həm də bugünlərdə Avropa Şurasının Parlament Asambleyasında Ştrasserin siyasi məhbuslarla bağlı hazırladığı məruzəni dəstəkləməkdən imtina edən Avropanın kürüsevər deputatları da bölüşürlər. Məhz Qərbdəki himayədarlarına güvəndiyinə görə Azərbaycan hökuməti bu qədər aşırı şəkildə hər gün insan haqlarını, hüququ, qanunu ayaq altına atıb tapdalaya bilir.
Bu həbslərin məqsədi ictimai-siyasi fəalları daha fəal mövqe bildirməkdən çəkindirməkdir. Həm Tofiq Yaqublu, həm İlqar Məmmədov xaraktercə elə insanlardır ki, əminliklə deyə bilərəm, bu haqsız cəza onların mövqeyinə hər hansı dəyişiklik etməyəcək.
Onu da deyə bilərəm ki, bu həbslər müxalifətdə, demokratik düşərgədə nəinki ruh düşkünlüyünə səbəb olmayacaq, əksinə, onun daha ciddi birləşməsinə gətirib çıxaracaq. Ölkənin bütün demokratik kəsimi hökumətin mesajını almış olacaq ki, o, hər hansı formada nə indi, nə gələcək haqda düşünür; ehtimal oluna biləcək hər cür alternativləri məhv etmək istəyir. Ona görə də zalım hakimiyyətə qarşı bütün demokratik qüvvələr tərəddüdsüz bir araya gəlməli, birlikdə mübarizə aparılmalıdır. Eyni zamanda Azərbaycan xalqı, o cümlədən regionlarda yerli padşahların zümündən boğaza yığılmış insanlar da başa düşəcək ki, onların problemləri lokal problemlər deyil, hər bir rayon ayrı-ayrılıqda öz zülmkarından azad oluna bilməz, bütövlükdə ölkəni zülmkarlardan, zalımlardan xilas etmək üçün ümumilli etiraz hərəkatında birləşmək lazımdır. Dinc və kütləvi mübarizəylə rejimə qalib gəlmək olar və olacaq da.
Hakimiyyət müxalifətin xalqla birliyindən qorxur
İsa Qəmbər:
- Biz dəqiq bilirik ki, nə müavinim Tofiq Yaqublu, nə də “ReAL” hərəkatının sədri İlqar Məmmədovun İsmayıllı hadisələrində bilavasitə iştirakı olub. Onlar sadəcə orada vəziyyəti dəyərləndirmək, öz gözləriylə görmək üçün hadisənin ikinci günü, yanvarın 24-də ora səfər ediblər. Bildiyim qədər qısa müddət orada olublar. Bəllidir ki, əsas hadisə 23-dən 24-nə keçən gecə olub. Ona görə də bu ittihamlar yalan üzərində qurulub, tamamilə absurddur.
Hakimiyyət repressiyanı dərinləşdirməklə müxalifəti, demokratik düşərgəni qorxutmaq, mübarizədən çəkindirməyə çalışır. Xüsusən də müxalifətin cəmiyyətlə, xalqla bütünləşməsindən qorxur. Ona görə də bu həbslərlə siyasətçilərə mesaj verməyə çalışır ki, gərginlik olan bölgələrə, xalqın ayağa qalxdığı əyalətlərə səfərlərdən çəkinsinlər. Ancaq bu, mənasız addımdır. Bu addımlarla nə Müsavat partiyasını, nə “ReAl” hərakatını, nə də digər qüvvələri mübarizədən çəkindirmək mümkün olacaq.
23 aprel logosı
23 aprel
