Iki rayonun icra başçısı işdən çıxarıldı. O rayonlarda insanların sevinci yəqin ki, aşıb daşır.
Bunu yaxşı başa düşürəm.
Ancaq sevinmək üçün bu hadisələr heç cir ciddi əsas ola bilməz.
Çünki başçılar yox, baş dəyişməlidir. Ölkəni səfalətə, ədalətsizliyin girdabına salan başçı!
Sizi düşünməyə dəvət edirəm; başçılar işdən çıxarıldı, lap yaxşı, bəs buna niyə rəsmi izahat verilmir?
Səbəb niyə göstərilmir?
Bu necə şəffaf idarəetmədir?
Niyə xalqı tapmaca tapmağa vadar edirlər?
Azərbaycan xalqı 15 ilə yaxındır ki, Eldar Namazovun, Vəfa Quluzadənin, Tofiq Zülfüqarovun işdən niyə çıxarıldığının rəsmi səbəbini öyrənməmişkən, əhalini növbəti “istefa” xəbərləri qarşısında çaş-baş qoymaq nəyə xidmət edir?
Bəyəm, işdən çıxarılma sərəncamında göstərilə bilməzdi ki, adamı qabiliyyətsizliyinə, xalqın qayğısına qala bilmədiyinə görə vəzifədən kənarlaşdırılır?
Bu işdən çıxarma mənə Heydər Babayevin nazir postundan uzaqlaşdırılmasını xatırladır. Onu elə bir vaxtda işdən çıxartdılar ki, rəsmi məlumatlarda Azərbaycan iqtisadiyyatı zirvələri fəth edirdi. Ağıllı adamlar o zaman çox təəccübləndilər: iqtisadiyyat belə çiçəklənirsə, bəs iqtisadi inkişaf nazirini niyə cəzalandırırlar?
Indi də başçı çıxarılıbsa, izahat verilməsə də, deməli, o, işinin ödhəsindən gəlməyib, xalqda əsaslı etiraz, narazılıq yaradıb. Çox yaxşı, anladıq.
Bəs bu “işini bacarmayan”, “qudurğan övlad yiyəsi” günahkardırsa, ona qarşı çıxanların günahı nədir?
Niyə başçıya etiraz edən Ismayıllı sakinləri, eləcə də Ilqar Məmmədov, Tofiq Yaqublu həbsə atılır?
Bütün bunlar onu göstərir ki, Ilham Əliyevin atdığı addımlar emosiyalara söykənir, onların arasında xalqın mənafeyini güdən məqsəd axtarmaq sadəlövhlükdür.
Təkrar etməyə məcburam: Ilham Əliyevin iki icra başçısını azad etməsi boş söhbətdir. Bunu hamınız bilin! Icra başçısı dəyiş-düyüşü, uzaqbaşı ölkədə bir günlük gündəmi dəyişə bilər, vəssalam!
Mitinq və aksiya həb kimi
Ancaq bir məsələ var. Ilham Əliyev bu sərəncamlarla bizə gözəl bir mesaj verdi. Bizi başa saldı ki, onunla, onun komandasıyla ən yaxşı tərbiyəvi davranış metodu kütəvi aksiyalardır, mitinqlərdir, piketlərdir. Ancaq bu yolla onlara təsir göstərə, insaniləşdirə bilərik.
Yoxsa, bu vaxta qədər o başçısı dəyişən rayonlardan xalq Prezident Aparatına, qəzetlərə nə qədər şikayət məktubları yollamışdı... Onların hamısını qulaqardına vurmuşdular. Mitinqi isə qulaqardına vurmaq olmur. Elə deyilmi?
Əli Kərimli barədə namaz bəhanəsi
Bir tərəddüd içindəyəm. Mütləq bir təşəkkür borcum var. Amma onun ünvanını tapmaqda çətinlik çəkirəm. Yazım, bəlkə siz yardımçı olasınız.
Özünü ruhani sayan birilə ölkədəki vəziyyəti müzakirə edirdim. Görüşümüzü təsadüfi saymaq olardı. O da ölkədə işlərin yaxşı getmədiyini deyirdi, mən də. Mən ona proseslərə qoşulmağı, mübarizəyə fayda verməyi təklif etdim.
Məndən soruşdu:
- Sizin rəhbər kimdir?
- Əli Kərimli!
- Namaz qılırmı?
- Yox.
- Namaz qılmayan adamın arxasınca necə gedə bilərəm? O hələ özünü cəhənnəm əzabından xilas eləsin, sonra məni bu dünyanın cəfasından xilas edər...
Razılaşaq ki, qulağa xoş gələn arqument gətirdi.
Ancaq...
Mən ona dedim ki, namaz qılan mübarizə insanı sənin üçün belə vacibdirsə, o zaman haqq sözü deyib zindana düşən Islam Partiyasının sədri Mövsüm Səmədovun ardınca get; partiyaya inanmırsansa, heç bir siyasi bağlılığı olmayan, namaz qılıb şərə, heydərizmə savaş açdığına görə həbsə düşən Hacı Abgül Süleymanovun davamçısı ol...
Hə, bax, bundan sonra bütün bəhanələr payız yarpağı kimi havada yelləndi.
Həmsöhbətim tərk-silah oldu və söhbəti dəyişdi. Indi mən bilmirəm, yalançı dindarları, namaz-orucu özünə maska edənləri susdurmaq üçün bizə güclü nümunə, arqument verdiyinə görə Mövsüm Səmədova, Hacı Abgülə təşəkkür edim, ya onları həbsə atmaqla bu arqumenti gücləndirəm rejimə?

Natiq Güləhmədoğlu