Mayın 6-sı Bakı Ağır Cinayətlər Məhkəməsində “Nida”çı gənclərə hökm oxunandan sonra ərazidə gərginlik yaranıb.

Məlumata görə, məhkəmə önündə toplaşmış gənclər etiraz şüarları səsləndiriblər. Polis sərt müdaxilə ilə gəncləri binanın önündən uzaqlaşdırıb, bu zaman jurnalistlərin də fəaliyyətinə əngəllər yaradılıb. Saxlananlar var.

Daha sonra gənclər “Nizami” kinoteatrının qarşısında oturaq aksiyaya başlayıblar. Bu aksiyaya da polis və mülki geyimlilər kəskin müdaxilə edib. Bəzi şəxslər saxlanıb.

Qeyd edək ki, Bakı Ağır Cinayətlər Məhkəməsi bir qədər əvvəl “Nida”çılar Zaur Qurbanlı, Rəşadət Axundov, İlkin Rüstəmzadəyə 8 il, Məmməd Əzizov, Rəşad Həsənova 7 il 6 ay, Bəxtiyar Quliyev, Üzeyir Məmmədliyə 7 il, Şahin Novruzluya 6 il azadlıqdan məhrumetmə cəzası verilib.

Ötən ilin mart-aprel aylarında tutulan “Nida”çılar əsasən kütləvi iğtişaşları təşkil etmə cəhdində təqsirli biliniblər. Hökmə görə, gənclər Məmməd Əzizov, Bəxtiyar Quliyev, Şahin Novruzlu, Rəşadət Axundov, Üzeyir Məmmədli, Rəşad Həsənov, Zaur Qurbanlı, İlkin Rüstəmzadə 2013-cü il martın 10-da Bakıda kütləvi aksiya zamanı “Molotov kokteyli”ndən istifadəyə hazırlaşırmışlar.