2 Ekim 2013 Çarşamba
Azərbaycanda ailəni dağıdan səbəblər
Bu il 2,3 min belə fakt qeydə alınıb
Son illər ölkədə boşanma hallarının sayı durmadan artır. Çoxları bunun əsas səbəbi kimi sosial problemləri göstərir. Ancaq məsələ ilə bağlı açıqlama verən Ailə, Qadın və Uşaq Problemləri üzrə Dövlət Komitəsinin sədri Hicran Hüseynova bildirib ki, Azərbaycanda artan boşanma halları tək sosial problemlərlə bağlı deyil.
Komitə sədri bildirib ki, bu qənaətə son 5 il ərzində aparılan araşdırmalar nəticəsində gəlinib: "2009-cu illə müqayisədə 2010-cu ildə boşanma halları daha çox olub. Araşdırma göstərir ki, boşanma hallarının səbəblərindən biri də kişilərin məsuliyyətlərini bilməmələridir.Məcburi şəkildə qurulan ailələr də bir neçə il keçdikdən sonra dağılır".
Boşanmağa daha çox qadınlar ərizə verir
Qadın Krizis Mərkəzinin rəhbəri Mətanət Əzizova hesab edir ki, bu, rəsmi göstəricilərdir.Qeyri-rəsmi nikahdan sonra boşananların sayını da bunun üzərinə gəlsək, vəziyyətin daha acınacaqlı olduğu üzə çıxar. M. Əzizova hesab edir ki, boşanmaların əsas səbəbi ailə zorakılığıdır: "Adətən qadının psixologiyasında öz ocağını dağıtmağa meyillilik olmur, o, uşağın atası olmasını istəyir. Yəni cəmiyyətdə onun barmaqla göstərilməsini qəbul etmir.Boşanmaya isə gedən tərəf çox zaman qadın olur.Bu addımı isə qadın həyat yoldaşı ilə birgə yaşayış mümkün olmadıqda atır.Kişilər isə çox nadir hallarda boşanma üçün ilk addım atır".
M.Əzizova boşanmaların digər bir səbəbinin erkən nikahlar olduğunu dedi: "İnsanın gərək həyat təcrübəsi olsun ki, münaqişələrdən qaça bilsin. Erkən yasda ailə quran qızların elə dövrü olur ki, münaqişələrə bəzən onlar özləri gedir, yəni hər deyilənə cavab qaytarılır, reaksiya verilir. Bu, tək kişi ilə deyil, qayınana və digər insanlarla da baş verir ki, bu da boşanmalara yol açır. Bununla belə, ana ola bilməmək və yaxud problemli uşaq dünyaya gətirmə də boşanmalara gətirib çıxarır. Hesab edirəm ki, durmadan artan boşanmaların qarşısını almaq üçün bu məsələ ilə əlaqədar sərt cəzaların tətbiq edilməsinin vaxtı çatıb.2010-cu ildə "Ailə zorakılığı haqqında" Qanun qəbul edilsə də, hələ də lazımi addımlar atılmayıb.Təklif edirəm ki, Cinayət Məcəlləsinə ailə zorakılığı törədilməsinin qarşısının alınması üçün cərimələmə və ya azadlıqdan məhrumetmə cəzası salınsın.Yəni bu cür hallara yol verənlərə qarsı heç olmasa, bir neçə sutka cəza tətbiq edilməlidir ki, kişilər qadınlara növbəti dəfə əl qaldıranda, düşünməli olsunlar".
Xəyanət Azərbaycan ailəsində boşanmanın əsas səbəblərindən biridir
Milli Məclisin Sosial siyasət komitəsinin sədri Hadı Rəcəbli isə hesab edir ki, boşanma səbəbləri sırasında ilk yeri ailədəki emosional gərginlik, əsassız söz-söhbət, dedi-qodu tutur: "Azərbaycan ailəsində boşanmanın əsas səbəblərindən ən başlıcası xəyanətdir. Oğlana, ya qıza hansısa nömrədən SMS gəlir və bundan lazımsız söz-söhbət yaranır.Bu da, öz növbəsində, boşanmaya gətirib çıxarır.Gəlin-baldız, gəlin-qayın arvadı arasındakı söz-söhbətlər də çox vaxt boşanma ilə nəticələnir.Hesab edirəm ki, valideynlər ailə quran gənclərlə diqqətli olmalı, onların mübahisələrini həll etməyə çalışmalıdır.Hazırda boşanmaya kişilərin pis vərdişləri (narkomaniya, alkoqolizm) də gətirib çıxarır.Hesab edirəm ki, ailəni qorumaq üçün bütün maneələrdən keçmək, ailəni qoruyub saxlamaq lazımdır".
Kaydol:
Kayıt Yorumları (Atom)
23 aprel logosı
23 aprel
0 comments:
Yorum Gönder