ağıyev adına kombinatın 4 saylı yataqxanasının sakinləri bu gündən öz balkonlarına qara bayraqlar asaraq etiraz aksiyası keçiriblər.

Cavanşir küçəsində yerləşən Tağıyev adına kombinatın 4 saylı yataqxanasının sakinləri bu gündən öz balkonlarına qara bayraqlar asaraq etiraz aksiyası keçiriblər.

Bu barədə bu gün hüquq müdafiəçisi Ələkbər Məmmədov Media Mərkəzində keçirilən mətbuat konfransında bildirib. Onu sözlərinə görə, yataqxanada yaşayan 80 ailə artıq qəzalı binada qala bilmir, yeni mənzil isə verilmir. Heç kim sakinlərin şikayətlərinə məhəl qoymur. Yeni ildən əvvəl sakinlər baş nazirin müavini Abid Şərifovla görüşmüşdülər. O, bir ay ərzində problemin həll olunacağını vəd etmişdi, lakin olmadı.

Ə.Məmmədov bildirib ki, dünəndən MİS əməkdaşları yataqxananın qarşısında ərazini abadlaşdırırlar və “yuxarıdan” kiminsə gələcəyini deyirlər. Bundan əlavə, Xətai rayon İcra Hakimiyyəti başçısının müavini yataqxana ərazisinə gələrək sakinlərə bildirib ki, onlara mənzil bir şərtlə veriləcək ki, şikayət etməsinlər.

Hüquq müdafiəçisi həmçinin deyib ki, yataqxananın sakinləri binaya baxış keçirmək üçün ekspert tutublar. Ekspert deyib ki, 3,5 bal gücündə zəlzələ olarsa bina uçacaq və təmiri də mümkün olmayacaq.

Ə.Məmmədov qeyd edib ki, sakinlər Prezident Administrasiyasının qarşısında piket keçirmək niyyətindədir, artıq belə yaşaya bilmirlər.

Xatırladaq ki, 2000-ci ilin noyabrında baş vermiş zəlzələdən sonra bina yararsız vəziyyətə düşüb. Paytaxtın İcra Hakimiyyəti yataqxanada yaşayan 160 ailə üçün yeni binanın tikintisi məqsədilə 40 sot ərazi ayırıb. 18 mərtəbəli, 2 bloklu, 432 mənzilli ev tikilib. Lakin binaya yalnız 80 ailə köçürülüb. Qalan 80 ailə hələ də yataqxanada qalır.